而家去旅行住酒店，一晚閒閒地都千幾二千蚊㗎，退房嗰陣梗係要拎得就拎，帶晒啲沖涼液呀梳呀針線包走啦！咁你而家知道點解明明冇乜點shopping，但回程嘅時候個喼會咁重未呀？

原來拎沖涼液呢啲都未算慳得醒呀，強國有對80後夫婦去日本名古屋旅遊嘅時候，就拎埋酒店塊智能廁所板走喇！咁又係呀，啲沖涼液咁細支，用兩用就冇 晒啦，廁所板就唔同呢，又高科技又襟用，識拎一定係拎廁所板！如果個喼裝得落，直頭成個sss坑搬走?呀！

帶佢哋個團嘅導遊話收到日本酒店通知話有間房個廁所板冇咗，佢問返嗰間房嘅夫婦有冇拎走廁所板，咁佢哋話冇，個導遊就梗係信晒啦，仲幫佢哋同酒店據理力爭?！點知之後再查落去，真係喺佢哋個喼入面搵到塊廁所板呀！唉，今次真係幫錯人喇～

都有網民話呢對咁慳得醒嘅夫婦唔係成個廁所板拆落嚟咁明張目膽，而係酒店換廁所板嗰陣唔小心留咗個舊嘅喺度，佢哋以為係上一手留底先拎走啫，不過講真吖，有分別咩…… 

其實用另一個角度睇，呢對夫婦都幾值得欣賞呀，可能佢哋都係想帶塊高智能廁所板返鄉下，話畀同胞知用廁所嘅樂趣，叫大家唔好再通街解決咋嘛！

封面圖片、資料來源連結：鳳凰網