最近有個12歲嘅肥仔喺香港屈咗9年蛇，而家希望申請返個居港權咁話。要嚟香港做新香港人，其實唔難，每個年代都有每個年代嘅方法，諗得到又睇得通嘅，咪有得留低囉！

70年代：達陣式換身份證

當年偷渡嘅人多，政府於是整個抵壘政策出嚟，入到市區就畀張身份證你，是咪正先？更正嘅係網民Wong Chi Man發現，肥仔似乎激活咗隱藏副本——新抵壘政策，偷渡落嚟、屈夠七年蛇就可以換身份證，係叻仔嘅！

資料來源：維基百科; Facebook留言

80年代：一家團聚是常識吧

老公/老竇一支公留喺香港實在係lonely咗少少，於是申請家人團聚，全家一齊放棄晒強國嘅一切嚟香港，真係令人好滾動！不過如果可以掉返轉，返強國一家團聚，一定會更加令人滾動啫。

資料來源：維基百科 

90年代：認親認戚認夫妻

冇香港老公/老竇/老母/老婆唔緊要，認返個咪得囉！大人可以假結婚，小朋友就可以搵個香港親戚做父母就申請得。不過要小心畀人拆穿喎，所以有精力有能力就要快啲生返一打，就算真係畀政府趕咗返強國，申請返落嚟都多幾個機會嘛（應該係）！

資料來源：蘋果日報

00年代：投資移民岡比亞

03年香港政府整咗個投資移民計劃，不過個計劃就唔包強國土豪嘅。但強國土豪真係好精，識得利用移民條件寬鬆嘅非洲國家——岡比亞，再以岡比亞居民身份移民香港，贏咗！

資料來源：網易

10年代：工聯會移民顧問

有財嘅，可以行雙非生仔計劃、雙非家庭香港陪讀計劃，或大媽慈善求學計劃。有才嘅，就可以行輸入內地人才計劃、或者嚟香港讀大學。兩樣都冇點算呀？唔使驚，嫻姨喺大廳！搵工聯會移民顧問喇，移民香港，嫻姨姨幫到你！

資料來源：蘋果日報(內地大媽來港讀書換居權); 蘋果日報(大媽殺入明愛讀哲學)

未來： 話嚟就嚟隨時歡迎

什么？香港？你是说香港市吧？想去就去好了，用得着移民吗？