香港正值多事之秋，一班激進廢青搞雨傘運動擾亂香港秩序，破壞香港經濟，仲經常出現辱警同港獨言論，令大家對香港未來失去信心。幸好仲有班發展商用巨型基建項目穩定民心，排住隊推出豪宅之餘，更改咗唔少精彩絕倫嘅樓盤名激勵港人，提升返港人嘅自信，令毛領導心懷安慰，特意在此引領各位嚟個樓盤名檢閱儀式，提高返社會嘅內凝力：
【雍容華貴型】
帝峯．皇殿
無論係中文嘅帝峯．皇殿，定係代表住沙俄時代皇宮嘅英文名The Hermitage，嗰份澎湃浩瀚嘅氣派，連我細細聲講出嚟都嚇到打冷震。
天賦海灣
呢個樓盤塊地雖然填海得來，但透過天賦二字歌頌人類識得填海嘅大智慧，而整個海灣最特別嘅係底層係睇唔到海的，仲神秘過百慕達三角洲同健吾三腳周。
【集體MK回憶型】
影岸．紅
呢個樓盤名主打童年回憶，令人聯想起初中玩Online game改MK名嘅青澀，先透過「影」同「紅」字表現出孤高寂寞嘅實力，中間嘅一點作為停頓位更顯人生在世嘅無奈……嗚，我哭了。
銀湖‧天峰
一睇呢個名，你不自覺就用慷慨激昂嘅語氣嗌出一招超必殺技──銀。湖。天。峰！每次講地址都可以當自己打緊《三國無雙》出大絕，夫復何求？
【袋住先型】
半山壹號
半山壹號雖然位處土瓜灣，但所謂石榴扮秋香，聽落仲威過司徒拔道同舊山頂道，確係樓盤界嘅XO，好感度同好飲度媲美C9最愛嘅果醋天地壹號。
壹號九龍山頂
將山頂由港島搬去九龍，加多個壹號喺前面，令只係座落喺荃灣嘅壹號九龍山頂充滿詩意，毛孩都不禁吟一句：「曾經山頂難為水，除卻荃灣不是雲」。
【生人霸死地型】
Twin Peaks
位處將軍澳嘅Twin Peaks，英文名向美國鬼才導演David Lynch執導嘅同名電視劇致敬。
套劇第一幕就係影住一條死屍，相信係發展商祝一眾住客先死而後生，實在用心良苦。
泉薈
位於洪水橋嘅泉薈，又名黃泉薈，聽見呢個咁別出心裁嘅名，毛孩懷疑住客可以在此通往陰間與祖先接觸，咁以後清明重陽就唔使拜山，多返兩日假。
