毛毛豬唔係淨係識食high class嘢嘅，有時道地嘢仲好食（適用於糧尾或者毛毛要我AA制嘅時候）！

上環熟食中心有間茶餐廳憑住佢隻西多，同埋咖啡奶茶出晒名！仲串到貼咗兩張揮春，話自己咖啡稱皇、奶茶稱霸喎！啲霸氣真係漏晒出嚟！

又抵佢咁串嘅，奶茶唔同於出面茶餐廳，佢係一支支㗎！汽水就話一支支好飲啲，原來奶茶一支支都好好飲！奶味夠晒重，毛毛豬冇咩奶，飲多啲就啱喇！

一場嚟到當然要試下佢個西……多啦～件西多上面搽滿牛油同煉奶，一食落口啲汁爆晒出嚟，古有漿爆牛丸，今有爆漿西多！

餐廳腦細見我食到成面西多汁，仲好細心咁畀卷廁紙我，雖然講唔出咩大道理，但毛毛豬真係覺得好有親切感，好似我老竇咁呀～

餐廳資料：

瑞記咖啡

地址：上環市政大廈2樓17號舖

電話：2850 8643

營業時間：聲稱開星期一至日5:30am-06:00pm，但有時星期日腦細話放假就放㗎喇～