一年容易又Ocamp，年年Ocamp都有大學生畀傳媒大爆玩意淫game，致力「聯合一群愛國愛港的青年朋友，共同出謀獻策，以建設美好的香港」嘅香港培青社梗係要衛護愛與和平，唔可以畀呢啲道德淪亡嘅事發生！

培青社喺facebook出咗個post，話歡迎同學仔send相向佢哋舉報淫game，張相登咗嘅話，仲可以有成2000蚊金手指費㗎，影多幾張，咪連Ocamp錢都賺返？

Ocamp淫game呢啲玩意，傷風敗德，真係此風不可長，毛毛梗係要努力舉報啦！第一個要舉報嘅淫game就係水戰！射到一身濕晒，件tee又透又貼，好易引起聯想㗎嘛！舉報你！2000蚊！

同枱食飯又唔用公筷，你哋班大學生讀咁多書都唔知食人口水尾係會生BB嘅咩？舉報你！又2000蚊！

跳Camp Fire跳到同學仔身水身汗，都會引起聯想㗎，仲有啲動作係拖手呀男女轉圈呀咁?，有身體接觸呀！舉報你！再嚟2000蚊！

夜晚玩房game就出晒事喇，又男又女喺間房度都唔知做乜，間房有床㗎，容乜易出事㗎？舉報你！嚟多2000蚊！

臨走寫龜背，咪會摸到女同學攻擊性武器個保護罩條帶囉？舉報你！咁就儲到成萬蚊喇，再用呢啲錢報名去Ocamp再舉報再賺錢，好快儲夠錢上車！YEAH！

資料來源：香港培青社