中學係人生最美好嘅時光

同學各位~找個位~這是你的開學禮~唉,你話你哋係咪犯賤吖......讀緊書嗰陣又唔想返學,出到嚟做嘢先知道讀書嗰陣有幾幸福,而家先嚟珍惜已經太遲喇!不過唔緊要,等毛毛同你哋重溫一下,你哋中學時期肯肯定會做過嘅嘢啦~

 

1. 上堂偷食

多數人上堂都係食下糖、𡁻下香口膠呀咁,level高少少嘅咪食埋薯片囉,再高lvl啲嘅毛毛以前嗰班試過有人喺英文堂食埋隔籬個女同學⋯⋯個M記餐𠻹呀~

圖片來源:痞客邦

2. 上堂釣魚

雖然時間表就中英數地理經濟音樂視藝體育⋯⋯乜堂都有,但講真你全日都淨係上緊中史堂之嘛!點解?堂堂你都去搵周公嘅,仲問?有靚女miss教嗰堂咪搵少陣囉......

圖片來源:台灣達人秀

3. 掟粉筆/粉刷

可能讀書太大壓力啦,個個都要靠掟嘢嚟減壓(好似而家掟飛鏢咁),一係就掟粉筆粉刷、一係就掟煲!

圖片來源:hoplay.com

4. 出貓

老老竇竇,我唔係常客,只係間唔中出......下貓㗎咋,10次默書有9次咁囉,唔算好多啫~

圖片來源:《逃學威龍1》截圖

5. 改老師花名

唔知點解,好似間間學校都會有個叫腸胃炎、波子陳、肥王、禿鷹曾嘅阿Sir/Miss嘅?嗯,其實又唔好話笑佢哋,啲花名都係令老師ssssss更加形象化、更加深入同學心啫!講真,當年冇畀人改花名嗰啲老師,我而家差啲連佢哋姓乜都唔記得呀!

圖片來源:《少林足球》截圖

6. 畫黑板/畫枱/畫書

唔賭唔知時運高,唔畫唔知畫功好!當想年杜甫都唔知做咗幾多個廢青嘅model呀,咁忙,真係辛苦晒~

圖片來源:新華體育

雖然當你哋諗返起自己做過晒呢幾樣嘢嗰陣,已經冇機會再做......但有心嘅咪約返班中學同學出嚟聚下舊囉,唔好再話唔得閒/有嘢做/返工好忙/男女朋友生日喇,唔通真係等到變咗中女羅生門先嚟約咩?

 

封面圖片來源:TVB

資料來源:痞客邦台灣達人秀hoplay.com新華體育

毛記電視網站 · 版權所有 · 不得轉載 Copyright © TVMOST.COM.HK All rights reserved