2015年12月01日 星期二
【你講晒啦】陳仲翔話囡囡冇講過考TSA好開心
今日陳仲翔上電台接受訪問嗰陣話呀，佢個女根本冇講過考TSA好開心，只係字眼上嘅問題，你哋班人全部跟車太貼喇（好似係）！
星期日民建聯成員陳仲翔帶埋囡囡去到立法會TSA公聽會，囡囡發言嘅時候表示，自己覺得TSA仲輕鬆過平時嘅測驗，又話最開心係考完唔會派返份卷唔駛改正，陳仲翔事後承認發言稿係由佢寫，不過內容都經囡囡同意。今日陳仲翔接受晴朗訪問，主持陳聰問佢到底囡囡有冇親口講過考TSA好開心，佢當堂靜左三秒，先至話佢真係冇講過，可能係字眼上嘅問題。不過陳仲翔節目後都有再打返比小編，話睇返當日發言稿內容，其實冇講過話「考得好開心」呢個字眼，希望可以澄清返。
Posted by 雷霆881 在晴朗的一天出發 on Monday, November 30, 2015
佢咁樣講，真係一言驚醒洛克人喎！睇返當日公聽會嘅片段，妹妹又真係好似應該冇講過考TSA好開心嘅：
是但啦，有講過又點，冇講過又點喎。反正篇稿係陳生自己寫嘅，佢鍾意讀完篇稿之後話唔代表本人立場都得㗎啦！毛毛係戥個妹妹慘咋，辛辛苦苦讀完篇稿，爸爸又話啲字眼有問題；返到學校，又可能畀另外嗰52%支持取消TSA嘅少數派家長話。唉，毛毛食花生都食得唔安樂呀真係。
封面圖片來源：youtube截圖
資料來源：雷霆881 在晴朗的一天出發、蘋果日報
