子華大神曾經話過，大家都係食魚蛋，通常人見到另一個人食得開心過自己嘅時候，只會想人哋同自己食得一樣咁PK，唔會話想自己都同人哋一樣食得咁和味嘅。但係美國呢個女仔Dana Olsen都唔同喇，佢自己唔開心，但都想其他人開心！

Dana本身定咗今個16號結婚嘅，點知就係呢日之前6個星期，佢男朋友竟然悔婚！發生啲咁嘅事，大家都唔想，而使咗差唔多成25萬港元搞嘅Wedding Party又冇得退錢，人又冇錢又冇，畀著毛毛，實會好灰9，淨係想匿埋唔想見人……

但係Dana並冇自暴自棄喎！佢反而決定照搞Party，不過主角就係一班露宿者！佢聯絡咗露宿者收容機構，邀請咗150位無家可歸嘅小朋友同女性參加呢個Party，成功將負能量轉化做正能量！

有啲露宿者仲得到髮型師免費幫佢哋梳頭同化妝，打扮到靚靚先去Party?呀～呢個女仔咁好心地，個新郎哥點解仲要同佢分開咁唔識寶呀……毛毛都成日要喺公司OT宿營㗎，不如你都招呼埋毛毛去你個Party呀～Any肥，你咁有愛，一定好快會搵到識得珍惜你嘅男仔！

封面圖片、資料來源：英國《每日郵報》