2016年01月22日 星期五
【真•繁忙兒童】小學生超灰日記
明明我已晝夜無間想討好老母，夢想中的心麻為何還未到～劉小華喺分獎典禮個台上面咁唱就型到爆，全場拍爛手掌呀，但老老竇竇，毛毛就唔係幾想喺現實入面聽到小朋友咁唱喇……
有讀者send咗幾張相信係小學生日記嘅相畀毛毛，話佢睇完自己都灰咗灰呀。冬天嘅星期六朝早，想瞓晏啲都唔得，已經係慘無人道嘅事！通常啲細路都係寫媽咪點點點無微不至地照顧自己呀、辛勤地做家務呀咁㗎嘛，但呢個細路竟然話媽咪叫佢起身嗰陣好似隻兇猛嘅老虎。55，毛毛諗佢差在未寫埋個乸字咋。
明明係放孖day，但媽咪就要佢星期六做晒啲功課，做完仲要練樂器同溫默書……喂呀媽咪呀，星期六唔係落公園玩至係嘅咩。放假都咁忙，毛毛真係唔敢諗佢平時返學日子有幾忙呀！話唔定有時間食lun廚已經好好㗎喇，要珍惜自由嘅空氣呀仔！睇到最後一行，佢話想沖晒啲功課落廁所呀！咁就啱喇，反抗極權！爭取自由！
但現實總係殘酷嘅，沖功課落廁所呢個反抗強權嘅諗法，只會存在喺FF入面，甚至只要諗到會畀媽咪鬧，就連諗都唔敢諗，正如打工仔們想射波又點呀，咪又死死地氣返公司做嘢仲要OT到12點。
小朋友，雖然你話希望明天會更好，但係，都係嗰句啦，現實總係殘酷嘅，媽媽咪一早同咗你講聽日會好忙囉...... 乖啦，大個仔返工，你就更好～很忙㗎喇。細個就驚老母鬧，大個就驚老細鬧，香港人嘅人生就係咁㗎喇仔，話唔定你99歲篇日記都仲寫緊「希望明天會更好」呀。
