噚日奧斯卡頒獎禮結果終於出爐，最佳男主角係里安納度呀！唉，雖然毛毛都好戥佢開心，但其實毛毛覺得佢嘅對手，即係隻熊人呢，都做得幾好，幾有戲㗎！可能同情隻熊拎唔到獎啦，喺台灣高雄壽山動物園就出現咗一隻識企起身，個樣仲好似思考緊世事嘅熊熊呀！

先生，有咩事你落返嚟先講啦，毛毛煮個麵畀你食吖好唔好？

就係呢張頭大身細嘅相，搞到成班台灣網友都喺度估，到底佢係真熊定係人扮呀！嗱都市傳說盛傳其實動物園入面好多動物都係人扮嘅，唔通呢隻都係？

梗係唔係啦，你估而家請人扮動物咁易㗎咩！高雄市市長陳菊同埋動物園都開post澄清返，話呢隻係堅﹒熊嚟，會咁樣企起身其實係搵緊佢個保育員喎！點都好啦，見到隻熊仲瘦過毛毛真係痛都心埋呀！希望你可以食得飽身啲，生得肥啲，唔好再畀人以為你係人扮嘅咁失威啦，嗚嗚。

封面圖片來源：PTT

資料來源：PTT、壽山動物園