2016年03月17日 星期四
【暖到入心入肺】巴士叔叔放乘客上車避西北風
曾經，有一架真摯嘅巴士泊喺毛毛面前，但毛毛冇好好珍惜，等到失去喇先後悔都嚟唔切，塵世間最痛苦嘅事，莫過於此。如果上天可以畀毛毛一個重新開始嘅機會，毛毛一定會早兩分鐘落街…… 不過邊有咁多機會呀，送車尾，咪唯有食住西北風等下一班囉。
但係有個網民就lucky過毛毛好多喇！佢話早幾晚凌晨想搭巴士嘅時候一個唔好彩送車尾，下一班車又仲有8分鐘先開，唔好睇8分鐘好似好短時間呀，夜媽媽要吹住風等車都咪話唔甘呀！
呢個時候，superman就出現鳥！下一班車嘅巴士叔叔開定架車埋站，仲話天氣凍凍地，叫幾個送車尾嘅乘客上車等住先呀！嗚呀，真係man過superman，暖到入心入肺呀！如果毛毛下次開完夜走咗班車都可以遇到咁warm嘅暖男叔叔就好喇……hehe。
封面圖片、資料來源：Tai Po 大埔
＜司機有愛系列＞
