2016年03月18日 星期五
【要哭哭了】爺爺整咗12個漢堡包 點知得一粒孫返嚟食
細細個嘅時候，就成日嫌阿爺阿嫲阿公阿婆煮嚟煮去都嗰幾味，唔想食佢哋整啲嘢，不過到大個仔，想食都食唔返嘅時候就後悔喇…… 唉，如果毛毛阿爺都好似呢個美國阿爺咁精靈，仲識入廚房整返幾味就好嚕！
話說呢個爺爺特登整咗足足12個漢堡包，諗住等6個孫仔孫女返去佢度食嘅，大家呢個時候實喺腦入面FF緊一個兒孫滿堂笑呵呵嘅畫面出嚟啦，可惜現實總係殘酷嘅，最後就只係得一粒乖孫返嚟食咋…… 整一個漢堡包都夠晒煩啦，仲要成12個喎，點知個個衰仔都唔理阿爺，你睇爺爺個樣幾sad呀……
嗰唯一一個返去搵爺爺嘅乖孫女將爺爺張相放咗上網，好多網民都留言話好戥爺爺唔開心，甚至睇一次喊一次呀！好彩另外兩粒孫都識做，即刻飛咗返去爺爺屋企食包包！
咁至係呀嘛，毛毛冇讀書都識啦，子欲養而親不在就唔好喇嘛！不過呢，其實毛毛都係有口話人冇口話自己……唉。
收工好返屋企陪阿爸阿媽阿爺阿嫲阿公阿婆食飯喇！孝與義，永在心！
封面圖片來源：kelssseyharmon/twitter
資料來源：kelssseyharmon/twitter、BHarmon_10/twitter、b2the_k/twitter
＜笑聲笑聲滿載溫馨系列＞
