子華神公布今年會有全新舞台劇，淨係條宣傳片已經丁死人，畀毛毛買到飛嘅話，肯定約到女神出街。但點解子華個樣好似咁唏噓嘅⋯？佢話，香港已經令佢笑唔出，更加暗示嚟緊兩年，都可能唔再搞棟篤笑。香港人連少少嘅歡樂，都已經唔存在喇⋯⋯

子華神每場棟篤笑都係睇極唔厭，無論係講政府，人性、社會、定預示香港嘅未來，嚟到呢刻，佢嘅金句依然應驗。但係未來兩年，都應該唔會再睇到子華棟篤笑，毛毛同大家都重溫返少少精彩金句。(利申定先，子華神金句太多，就一定不能盡錄。)

【講佔領】

「你係佔中，定係反佔中？係視乎你覺得香港嘅病有幾重。我曾經聽過一對男女嘅對話：『你想整容呀？整容分分鐘變毀容喎！』嗱！信呢句嘢嘅人，好可能就係周融喇！唔好亂搞嘢，分分鐘，『毀融』。」

【講人性醜惡】

「錯就要認，要對方認！」

「香港人而家打開報紙打開雜誌，就係睇緊《尋找仆街的故事》。如果你起身就係要尋找一個仆街，無人唔係仆街，你只可以係未仆街。但係你一定仆畀我睇。」

「我哋今時今日嘅香港係處於咩狀態？我哋買串魚蛋都咁㗎嘞！做咩佢又無咗甜醬，又無咗兩粒，佢仲食得咁開心呀？唔公平！咁點先公平呀？大家都唔開心囉！大家食得好仆街咁囉！」

【講社會】

「大自然所有嘅動物都喺食物鏈上面。鏈嘅下層俾鏈嘅上層食，一層一層咁鏈上去。」

「人類有人類自己嘅食物鏈。人類嘅食物鏈簡單好多，只有3種。最下層係無產，中層係中產，頂層係冚家產⋯名副其實冚家都係產，係絕無不敬嘅成份。」

「搵食啫！犯法呀？我想㗎？」

【論中港關係】

「阿媽標仔參，邊個畀贖金？」

「而家香港嘅問題，係所謂嘅婆媳糾紛，係一種必然瀨嘢嘅關係，係咪？除非你個新抱可以喺第一日入門，就全心全意同奶奶講:『奶奶，我愛你!』」

當然仲有最經典一句：「請你好好放低！」

依家呢刻講起香港，每日嘅新聞荒謬過膠劇，我哋已經笑唔出，只有特事特辦嘅人先忍唔到笑。未來嘅香港會係點？毛毛望唔透，只係希望仲可以再聽到子華講笑話。

#等你呀子華神

封面圖片及資料來源：黃子華 - 子華本部