【係母愛呀哈利】台灣學生塞氣球感受做大肚婆有幾辛苦

仲有3日就5月8號喇!呢日係咩日子?咪星期日囉!yeah!呀,咪住先,咁開心做咩呀?星期日咪又一樣要返工……呀毛毛記得喇,5月8號係母親節呀!細個問毛母到底毛毛係底係點嚟㗎,毛母都會話係喺石頭爆出嚟,哼,如果係咁就好喇!唔好以為毛毛唔知,其實BB仔係媽咪懷胎十月辛辛苦苦生出嚟呀!

圖片來源:中時電子報

成日喺街度見到大肚婆行得好慢好慢,行步路都好似好攰咁,陀BB有幾辛苦,我哋真係想像唔到呀!最近台灣有間中學就搞咗個活動,要班中學雞塞個大波波入件衫度,上堂、去廁所、甚至打掃課室都要好好保護個波波,感受下做大肚婆有幾辛苦呀~

圖片來源:中時電子報

同學仔話原來陀住BB行樓梯根本睇唔到路,要好小心咁一步一步慢慢行,唔係就會好危險!仲有同學仔要塞兩個波波入肚扮陀孖B 𠻹呀,嘩陀一個BB已經郁都唔敢郁,陀孖B咪直頭想全日坐喺度就算?

圖片來源:中時電子報

同學仔陀嘅只係氣球,已經覺得好攰好唔方便,又下下都驚會整爆個波,可想而知媽咪陀真BB有幾辛苦!世上最偉大嘅,果然係母愛呀,哈利!

 

 

封面圖片、資料來源:中時電子報

=====<幽默老母系列>=====

【喊出嚟】阿媽以為對襪染咗色 即刻拎去漂返白

【去去麻瓜走】阿媽呢支係魔杖 唔係樹枝呀 !

【喊出嚟】阿媽你又話買咗姆明床單嘅?

【阿媽你真幽默】換貓糧竟然換咗呢樣嘢

 

毛記電視網站 · 版權所有 · 不得轉載 Copyright © TVMOST.COM.HK All rights reserved