細細個嗰陣，真係對剝牙呢樣嘢既期待又怕受傷害呀！又驚痛驚流血，但又好期待剝完牙可以話畀人知我大個仔喇，仲可以買雪條食呀嘛！ 不過講真呀，點計都係驚多過期待嘅……除非有得好似加拿大呢個小妹妹咁，用特別的剝牙技巧啦！

呢個眼仔大大嘅小妹妹大個女喇，開始要剝牙喇，所以爸爸就帶咗佢去公園度搵松鼠仔幫手喇！爸爸首先將條線嘅一邊縛住佢隻牙仔，一邊縛住嚿燕麥脆脆引松鼠仔嚟食～

正所謂妹妹仔剝牙，願鼠上釣，好快就真係有隻松鼠仔走埋嚟食燕麥脆脆喇！小妹妹擘大個口，3，2，1！松鼠仔一擸走燕麥脆脆，牙仔就跟住byebye喇！Woo，爽呀！

小妹妹都成功進化做崩牙妹喇，你睇佢笑得幾開心！早知毛毛細個都學佢咁剝牙啦……不過唔係喎，香港邊有咁易搵到可以同小動物交流嘅真公園呀？

封面圖片、資料來源： Viva Frei／YouTube