明明而家就成30幾度咁熱，但都可以見到唔少妹豬著黑絲出街，上身賣涼粉，下身就蒸鬆糕咁，乜對腳唔熱嘅咩？點知毛毛個港女同事話呀，嗰啲咁實色黑到一啲都唔透肉嘅，唔係黑絲，而係彈性襪褲嚟呀，傳說話可以瘦腿㗎喎～

台灣就有個讀護理系嘅網民話佢哋實習嘅時候成日坐或企，雙腳痛到痺，好容易會靜脈曲張，所以彈性襪褲就係佢哋護住對美腿嘅好拍檔喇～

點知有一日，佢同學仔啱啱瞓著仲懵懵下，將對彈性襪褲著到一半先醒起未除睡褲，但係又趕時間，唔想又除又著，你知啦，彈性襪褲本身已經緊到要跳一跳起先著到，搞嚟搞去實遲到啦！於是，佢落咗個好沉重嘅決定，就係剪爛條睡褲佢！！！呢個人生態度真係好正確，睡褲可以再買，時間過咗就唔會返嚟嘛。

親眼見證同學剪爛條睡褲，係就係好震撼心靈，但相信都唔夠見到呢個畫面咁崩潰！呢個傻豬豬網民開開心心咁買咗隻新mouse返屋企之後，梗係立馬搵把鉸剪出嚟拆開個包裝啦～佢話剪剪下覺得卡住卡住有啲難剪，不過一樣無礙佢嘅興奮心情，一於大大力咁剪落去啫！點知，原來佢一嘢剪爛咗條mouse線……相信呢隻會係史上壽命最短嘅mouse。

不過咁仲好啦，家陣無線mouse好貴㗎。

封面圖片、資料來源：jfosufd (jfosufd)／PTT、 ENCOREH33456 (XM3)／PTT