假的！本身毛毛膠膠興興咁做足準備，諗住今日一起身就可以成為小精靈訓練員，點知原來係放流料！毛毛真係好希望呢個消息是假的！

雖然自己冇得玩，不過睇下班Pokémon Go海外玩家玩成點都係開心仔嘅！最近美國有間動物收容所就食住個勢，搵班小精靈訓練員邊收服小精靈邊幫手放狗喇！又係喎，反正都係出公園行嚟行去，不如順個靚便帶埋隻狗一齊啦，話唔定狗狗都一直冇放棄過成為一個小精靈訓練員嘅偉大理想，等咗呢個機會好耐呢～

動物收容所個招募義工post一出，只係一粒鐘咋，已經有唔少大人細路齊齊排隊幫手帶狗狗散步！

成日聽人講狗狗有超能力可以睇到人類睇唔到嘅嘢，原來係真㗎！佢哋唔使用電話都一樣睇到邊度有小精靈㗎！去啦布魯托！收服佢啦！

真係估唔到原來小精靈同狗狗仲要幾啱key咁，畀波波企喺背脊咪當搲痕囉～

不過話時話，小精靈訓練員嘅浪漫，其他人又點會明呀，如果日日都同阿媽講自己出街捉小精靈，實畀佢鬧咁大個人都冇嚟正經啫。所以呢，狗仔呀，拍硬檔，散多幾次步啦，辛苦晒你喇～

封面圖片、資料來源： MuncieAnimalShelter