世上娘娘何其多，一開挨豬，呢個又露腿嗰個又高炒自拍，好似只要一post相，就係人都做到女神咁呀！不過娘娘多，兵仔仲多呀，個個都烏蠅摟屎……呀唔係，蜜蜂摟蜜糖咁圍住挨豬女神留comment，不過啲留言清一色都係「好靚女呀」、「jed」、「more」，邊博到女神注意㗎。

不如學呢個台灣網民咁逆向思維仲好過啦，就算博唔到女神注意，都呃到其他網民一笑呀嘛！

摩擦力類

呢位網民摩擦力都唔差㗎，次次丁親女神啲相都會金睛火眼咁睇埋佢身邊啲嘢。女神用緊哈姆太郎主人tone講嘢，你個兵仔竟然唔應返句「pi茄」，仲問佢地板邊度買？下一個回覆一定會更加精彩啫！

誠實類

其實娘娘成日話自己又黑又肥，咪又係想人讚佢靚……一般嘅兵仔都淨係識擦娘娘鞋，但佢就兵行險著，有嗰句講嗰句！娘娘睇到佢個comment一定會記實佢啫！

關懷類

女神輕輕合埋眼自拍個樣真係好pure好true，好似個瞓著咗嘅bb仔咁，見到都想錫一啖佢面珠仔呀……不過馬路如虎口，合埋眼又真係dan9ger咗啲嘅。除咗提佢小心過馬路，仲好細心咁提佢記得落妝同熄燈先瞓，真係好warm呀～

最令人感動嘅係，係人見到娘娘成個波波球……咁打耳嘅相，都淨係會focus喺波波球度，但佢竟然都可以保持清醒，叫娘娘小心空間扭曲！

讀心類

其實娘娘都係人，娘娘都有靈魂，娘娘都需要愛……平時班兵仔淨係留意佢身材有幾好，自拍有幾靚，從來都冇真正關心過佢空虛寂寞凍嘅內心。呢個出色嘅網民就同娘娘心有靈犀，淨係靠睇相都進入到娘娘……嘅內心世界，估到佢諗緊咩，原來現代愛情故事都可以咁浪漫。

當毛毛想拜會呢位世紀神回覆台灣網民嘅時候，就發現佢個挨豬冇咗喇，唔知係咪畀咁多位方丈…呀唔係，娘娘一齊report佢呢。唉，毛毛唯有辛苦啲，繼續努力丁多啲女神挨豬睇下搵唔搵到佢其他神回覆先。

封面圖片、資料來源連結： 台湾阿呆仔／微博