成班舊同學re－U，除咗摷返十幾年前單7嘢嚟笑、講返以前邊個暗戀邊個，又講下而家做緊咩工搵緊幾多k之外，梗係唔少得影返張大合照留念啦。不過又唔係個個都咁抵得諗，肯搬個三腳架出街就係為咗影一張相㗎，都唔怕嘅，搵人幫手揸機咪得囉。

台灣有班後生仔返中學re－U嘅時候，就搵咗實Q伯伯幫手揸機喇。咁春青嘅大合照，都係跟返國際慣例，男上女下分兩排啦。好喇企定定喇你班馬騮，三，二，一，cheese～～咦？點解張相…得返半班男仔㗎？雖然伯伯你心入面只有班乖乖女同學，但都唔使咁做得咁明顯，cut走晒班男仔個頭呀……

原來影相有技巧，搵人揸機，都一樣有技巧㗎，你估係人都可以影得出咁有style嘅相㗎？有另一個網民話之前喺澳洲嘅時候，落咗幾星期雨，有日難得好天，所以就拎晒啲嘢出嚟晾喺架車度曬太陽，當然都不忘影相留念啦。

有個老婆婆經過就主動話佢哋影相喇，嘩，外國人真係好nice呀！不過張相就……有特別的攝影技巧咁囉。

婆婆影完一張，仲話影得唔好要再影過，真係熱心喇。點知睇埋第二張相……一張遮住個人，一張遮住架車，返去key埋佢咪冇事囉，easy執啦。

笑甚麼笑！後生仔，第日你做咗人老竇老母，都一樣會練成特別的攝影技巧㗎！

封面圖片、資料來源連結： sharkass／PTT、Chdolodocha／PTT