最近有網民話柴灣一個行為藝術展覽涉嫌虐待動物，喺網民upload嘅相可以見到雀仔孤伶伶咁企喺一個冷冰冰嘅大鐵籠入面，睇嚟籠入面嘅雀仔想飛出嚟，出面就唔會有雀仔想飛入去喇。

網民指呢個藝術展覽已經開始咗一段日子，起初7月嘅時候只有一隻雀仔，但過咗兩三星期之後就不幸死咗。

後來主辦單位就放咗新嘅兩隻雀仔入個籠度，過咗5日，其中一隻雀仔都死咗，就咁瞓喺籠底，而另一隻雀仔就喺同伴身邊不斷跳嚟跳去，好似好傷心咁。

有另一位網民之後就見到最後一隻喺籠邊掙扎徘徊嘅雀仔都死咗，伏屍喺佢已故同伴身邊，成個畫面相當陰公。呢個藝術展覽由7月8號開始到網民post相期間呢短短一個月，已經有3隻雀仔離奇死亡，唔少網民都認為主辦單位涉嫌虐待動物，希望可以中止呢個展覽。

睇返貼喺展覽嘅介紹，寫住「結集喻意和詩意的作品」，然後有一堆個個字都識但加埋一齊就好深奧嘅用詞…… 呢個展覽應該即係想當隻雀仔係人，當鐵籠係香港蚊型住屋，表達人同居住空間嘅關係咁啩。

到底點解3隻雀仔會離奇死亡呢？呢個藝術展覽又有冇虐待動物呢？毛毛嘗試過聯絡主辦單位但暫時未得到回應。藝術應該係賦予死物生命，而唔係奪走生命，希望雀仔R.I.P.。