講起寵物，好多人都會第一時間諗起喵星人同汪星人，但其實金魚都係唔少人嘅心肝寶貝嚟。雖然金魚唔似貓仔狗仔咁可以畀主人攬攬，又冇得同佢出街街散步，感覺好似冇咁親密，不過金魚喺主人心目中一樣係好重要㗎！

最近外國有條金魚唔小心畀魚缸入面嘅石仔哽住喉嚨，隨時有生命危險，主人梗係立馬帶佢睇獸醫啦，唔通用個碗骨落骨落咩。

金魚個嘴仔咁細，要拎返粒石仔出嚟真係唔容易，獸醫都話好難搞，主人不惜使成500蚊美金（嘩即係成3800蚊港紙）都要救返佢嘅心肝寶貝！好彩經過獸醫嘅一番努力之後都成功救返金魚仔，仲話主人夠醒目，發現到金魚仔有異樣，唔係就慘慘喇！

可能有人會覺得金魚幾十蚊條咁平，死咗咪一嘢扔落廁所沖走佢算囉，使咁多錢救條金魚唔化算。但係呢個故事就話畀我哋知，無論咩寵物都係一條生命，由你帶佢返屋企嗰一刻開始，就要盡責任照顧佢一生一世！

封面圖片、資料來源連結：Brisbane Bird and Exotics Veterinary Services