古往今來，示愛有三寶：戒指（大大粒鑽石是常識吧）、膝頭哥（用嚟跪低）、玫瑰花（999枝走唔甩），不過時代唔同喇，係就係999長長久久，不過仲用玫瑰花咪out晒囉。

好似呢個強國男咁，知道女神鍾意食柚子，就用999個柚子砌個心型出嚟向佢表白，輸人都唔輸陣吖嘛。女神都禮尚往來，請返佢食大大個檸檬…… 毛毛呢次就撐個女仔喇，仲細咩，送食物咁幼稚！好心佢就向呢個師兄學下嘢啦！

最近喺哈爾濱有個男仔用999盒套套砌個心型出嚟向女神示愛，唔好諗到咁低俗咁膚淺住，佢嘅意思係，男人一生人只有6000次啪啪啪嘅機會，而佢就希望每一次都屬於佢女神！真係聽到都覺得仲浪漫過嘟敏俊C呀！

除咗表示希望同女神做6000次愛做的事之外，仲係因為套套男本身係反對女神做成人用品生意嘅，不過而家為咗表示支持，佢就用套套嚟表白喇。

女人一生最大嘅願望，不外乎搵到個專一嘅好男人照顧自己啫。呢個套套男咁識講嘢，女神就梗係接受啦，結局就好似公主坐上馬車咁，女神坐上套套男架保時捷跑車直奔遠方…… 

而999盒套套，就喺30秒之內以光速畀食花生嘅群眾搶晒。套套男雖然有保時捷助攻，但係都依然用誠意同唔知用唔用得晒嘅套套嚟打動女神，一句都冇提過自己有跑車；女神最後見男方冇晒啲套套，只係得返架爛鬼車都依然跟佢走，呢啲就係真愛呀，哈利！

封面圖片、資料來源連結：哈爾濱身邊事／微博、財經網

延伸閱讀：【喊出嚟】畀女神拒絕都算啦 做咩仲要搶埋我啲柚喎！