由細睇到大嘅日本動畫，所有角色都生活得悠哉悠哉，得閒就出下海、上下山、甚至用三五七年去修練，不知幾風流快活，又點會明白我哋生活喺香港嘅苦況呢？
毛毛而家就搵幾個代表人物，睇下佢哋會點「生存」落去。
No.1 【野原廣志】
以現時匯率嚟講，月薪30萬日元嘅上班族廣志，喺香港可以賺到22,922蚊。眾所9知，香港生活費萬物騰貴，究竟廣志可唔可以用呢二萬幾人工養到老婆仔女呢？
首先，四人家庭基本生活費大概要幾千蚊，即使廣志已經「上咗車」，但佢層樓仲要供多32年，齋係還利息畀銀行都唔少。再加上喺香港養車仲貴過養人，如果佢日日揸車返工，就算唔使畀車租，每個月都要畀成三千幾油費。淨係普通衣食住行呢筆數，已經用咗佢一大半人工嚕！
由於香港仲未有幼稚園學費資助計劃，讀咗咁多年幼稚園嘅小新，廣志每個月又要供奉多大約三千蚊畀學校。而且，為咗令小新可以贏在起跑線，廣志又要幫佢報19幾樣興趣班，幾百幾百咁加，小新每月嘅開支都可能要成五千蚊。
未完！唔好唔記得，廣志仲有個港女老婆美冴！不但係全職師奶，仲要成L日行百貨公司，買埋買埋好多名貴嘅珠寶首飾、護膚品畀自己，但就買減價貨畀廣志同小新。而且，喺香港畀家用是常識吧！一支公搵食嘅廣志，分分鍾仲要畀埋美冴老豆老母嗰份?！
No.2 【漩渦鳴人】
忍術喺香港應該又會畀人話冇經濟貢獻，咁只係識忍術嘅鳴人點先可以喺香港生存到呢？首先，一定要講多重影分身之術啦！
香港而家乜都炒得，波鞋、電話、限制版寫真集都得，可以話係有價有市！鳴人只要使出多個分身，就可以同一時間排晒咁多樣嘢，甚至可以做埋分銷，一條龍服務，賺晒咁多油水！生活上，食飯時仲可以一個人排晒咁多間餐廳，唔使女朋友等到嬲豬。
色誘術
正所謂「收兵好過嫁人」，只要有兵，鳴人使鬼出去做嘢咩！只要用色誘術，鳴人都可以變成女神啦，食飯又唔使畀錢，仲成日有禮物收添，甚至可以免費去旅行。
替身術
如果鳴人喺一個扮工人士，畀老細捉入房，又或者被安排好多嘢做時，就可以使出替身術，瞬間變成碌木，逃之夭夭，將所有「SO州SSSS」轉贈其他同事。
No.3 【小早川瀨那】
雖然瀨那仲係一名高中生，但佢點都有一日會踏入社會，如果佢踏入嘅喺香港社會又會點？
佢每一日返工就要用光速趕巴士、趕地鐵，再以惡魔蝙蝠俯冲，喺車門閂之前，撞入車廂同人逼。返到公司，又要做老細嘅跑腿，幫手買飯盒，買禮物畀佢女朋友...總知日日做到冇收工，對生活完全缺乏熱情。
然後，有一日經過球場，先醒起自己以前有幾威，曾經打過全國賽（香港應該係叫學界），仲拎埋冠軍添。見到身上嘅裇衫領呔，先開始反思自己幾耐冇打過波，每日做嘅運動可能只係追車，過去對美式足球嘅熱血已經留唔住。
望到成班後生仔一齊打波，問返自己上一次同蛭魔佢哋見面又係幾時呢？想知佢哋過得好唔好，但又唔夠勇氣撥個輪，最後都係不了了之...
唉，見到三位嘅情況，都係畀佢哋返日本啦，因為毛毛仲想睇好開心嘅《蠟筆小新》、感人嘅《火影忍者》同熱血嘅《衝鋒21》呀！
（封面圖片來源：動畫《蠟筆小新》、《火影忍者》、《衝鋒21》截圖）
