今日一打開twitter，就係咁畀呢幾張熊貓bb相洗晒板呀！大熊貓圓碌碌成個波咁，動作又論論盡盡，已經夠晒打耳，迷你版熊貓仔更加不得了，可愛程度爆晒燈呀！

噚日喺成都大熊猫繁育研究基地有23隻今年出世嘅熊貓bb同大家見面，全部都乖乖咁瞓喺度任人影相，遠睇好似一大堆芝麻湯圓呀～

咦，睇嚟有隻bb年紀細細已經有不凡抱負，唔甘心只係成為一大堆芝麻湯圓其中一隻，於是就嘗試爬爬下，想搶下fo喎。咁細個已經明白到「人潮內越文靜越變得不受理睬，自己要搞出意外」嘅生存之道，真係後生可畏。

哎呀！一個唔小心，就跌親喇！唔准笑佢手短腳短論盡仔呀，一定係塊綠色墊唔好，係佢出手先嘅！

唔緊要啦，哥哥抱返，呵返呵返～雖然覺得熊貓bb無啦啦跌親好慘，但覺得佢真係好打耳，總之就成個心融化晒啦～

Between，有冇人開頭睇到第一張相，以為有隻天生異稟嘅熊貓bb……

封面圖片、資料來源連結： 四川日報／微博、粥泡飯Z／微博