毛毛都同大家些牙過啦，小朋友真係睇少眼都唔得㗎，媽咪行開半步咋，佢哋就會用9秒9嘅超極速變身做化骨龍進行肆意破壞！掹紙巾、周圍畫牆原來都已經小兒科喇，呢個阿B仲犀利呀！

阿B，做咩企喺馬桶前面呀？好污糟糟㗎，快啲返出去去啦！咦，睇真啲，個馬桶鋪滿一大片啡色嘅？唔通BB終於有便便？咁要post上FB話晒畀姨媽姑姐知先得啵！

睇真啲，原來馬桶入面滿滿嘅都係狗糧呀！阿B竟然偷偷地將屋企袋狗糧一嘢倒晒落馬桶，仲要好似咩事都冇企埋一邊搲鼻哥，真係吹佢唔漲……

喂細路，你唔好曳曳呀，咪諗住閂埋個蓋就咩事都冇喎，唔通學校冇教「掩耳盜鈴」呢個成語嘅咩！呀唔記得咗，鬼仔係讀雞腸㗎啵……Don't 唔知咩ear steal ling，un 唔un？

狗狗竟然開開心心咁走埋去小主人度，仲要開始食佢嘅狗糧放題……「嘩正呀喂！乜今日有咁大盆豆豆嘅汪！以後都係小主銀餵本汪就好喇！」

不過最崩潰嘅，應該係個老竇……事關媽咪見到咁衝擊嘅一幕，竟然係話「等Daddy返嚟執」……收工攰到狗咁仲要執sss坑入面嘅狗糧，老竇應該想一嘢沖走佢就算9數。

封面圖片、資料來源連結：ring／YouTube 

延伸閱讀：【BB保你大】睇漏一眼啫 點知就搞成咁喇！