人人都話細路又pure又true，但其實小朋友嘅遊戲當中係包含好多大道理，係需要花多十幾廿年先消化到。

猜皇帝

玩法好簡單，揀完一個皇帝之後，就排隊輪流挑佢機猜包剪揼。不過，身為皇上又點會輕易咁畀你單刀直入，就算你辛辛苦苦猜到最後一關，你都要猜贏佢身邊嘅侍衛、大臣同丞相先有得同皇帝對猜。如果呢個時候輸咗，就要重新嚟過...

做到皇帝，個樣都囂啲！
 

正所謂小朋友係大人世界嘅縮影，細個已經深深明白到你要打低你嘅敵人要先打低佢身邊嘅侍衛。

老師話

細個老師係權力嘅象徵，總之老師話做咩就要做咩，所以就有呢個遊戲嘅出現。

咁點玩呢？

只要你喺所有嘢之前講加返句「老師話」，全部朋友仔就要跟你做嘢，邊個冇跟就會輸，就會畀人罰㗎喇！

而家睇返好似好無聊咁，但其實我哋又何嘗唔係玩緊「老細話」？老細話「你要做晒先有得收工」，你估你有得走咩...

最慘慘豬嘅係...個遊戲係冇玩完嘅一日！

估領袖
首先揀一個人行開一陣，其餘嘅人就揀一個領袖出嚟，跟住佢做嘅所有動作。而行開咗嘅人，就要重新返嚟估邊個係領袖。

呢個遊戲除咗話你知跟風嘅重要性、仲教你做人切忌出風頭，因為做得領袖就要冒住畀人估中嘅危機，一唔小心就會到你畀人驅逐。

去到OCamp，估領袖就會重出江湖，演化成新版佔領袖，毛毛諗大家都有類似嘅經歷，而仲未玩過嘅朋友就期待下啦！

呢啲遊戲，雖然講唔出咩嘢大道理，但係毛毛玩完之後覺得非常之有親切感，亦都高度推介畀大家！