「我愛你」呀、「你愛我」呀呢啲情深說話就係人都識講，但其實愛唔應該得個講字，愛，係要做出嚟㗎！就好似呢位台灣準新郎哥咁，佢就完美示範咗點樣用行動證明自己嘅愛呢～大家睇下，佢竟然陪未來老婆大人試婚紗陪到連自己都忍唔住試埋一份喎！

吖，毛毛以為呢位準新郎哥係話自己等未來老婆大人等到悶，自己都忍唔住走去試禮服啦，點知原來佢係講緊自己都忍唔住去試婚紗……um，結實嘅背肌喺紅色晚裝嘅襯托底下，啲膚色又係顯得幾紅粉菲菲嘅。

而呢位準新郎哥喺未來老婆大人面前，仲表現得特別小鳥依人?～

老老77，呢位準新郎哥著婚紗個樣咁省鏡，怕唔怕搶咗未來老婆仔嘅風頭先？萬一陣間個個掛住同你selfie，即係自拍啦，咁新娘子咪好陰公豬？！

btw，雖然可能會有人覺得呢位準新郎哥男人老狗著婚紗唔知似乜咁，但毛毛絕對可以好肯定咁同大家講……呢啲就係愛呀哈利！

資料來源：呂呈訓／爆廢公社