雖然香港人慣咗叫自動販賣機做汽水機呀，但其實一早就唔止得汽水賣，大學入面都成日見到有賣零食呀、USB呀咁嘅機啦。日本嘅自動販賣機出名多款，由你估到嘅汽水機，到你估佢唔到嘅機都有！

就好似超邪惡小食機咁，明明本身唔肚餓，經過一見到都好難忍手唔買嚟過下口癮囉！

仲有呢部24小時花束販賣機呀！一年到晚又拍拖週年紀念日又第100次錫錫紀念日又第1314次拖手紀念日，一個唔小心唔記得咗就死喇！好彩有呢部花束販賣機，夜媽媽醒起係重要日子都可以即刻飛去買扎花補鑊！

但喺自動販賣機又多又新款嘅日本，竟然有個網民遇到部被時間遺忘嘅自動販賣機！就咁睇落，佢已經老弱殘軀，甩皮甩骨，拎去收買佬度人哋都廢事收嗰隻。

成個出土文物咁款，唔講真係以為呢部係古裝街嘅道具嚟呀……

機入面賣緊嘅飲品清一見都係100円，雖然擺到甩到色，不過而家出面好多都賣緊百幾円㗎喇，咁平點都撳返罐試下啦，唔好執輸呀！

出嚟嘅飲品上面印住嚐味期限係……2012年。古董販賣機賣過期飲品，其實都係正常嘅，唔意外唔意外。唔通人哋見其他自動販賣機啲貨品咁特別，偷偷地轉咗行賣時間囊又要話你知咩！

時代に置き去りにされたみたいな自販機があった。
ちゃんとお金いれたら動くことに驚いた。

でも飲んで大丈夫か？これ… pic.twitter.com/dECi3bL2IW

— リッカ@おかえり黒柴 (@nicola_tess) November 12, 2016

封面圖片、資料來源連結：樂吃購日本、nicola_tess／twitter