《日式麵包王》，毛毛細細個就聽過呢個名喇～那些年，睇動畫總係會有無限FF，睇完《四驅兄弟》真係會對住架車9叫，睇完《超速搖搖》就拎住個搖搖起勢亂揈，咁睇《日式麵包王》就梗係想整麵包啦！當然，結果梗係 畀阿媽扭住耳仔咁趕出廚房啦，仲畀佢鬧睇動畫嘅嘢都信，第日實畀人呃呀！

我信，毛毛真係信㗎！估唔到n年後，終於有人證明日式麵包王嘅麵包係整到出嚟㗎喇！仲要堅係食得入口㗎！呢位台灣嘅妹豬喺討論區度開心share 咗幾款跟足動畫整嘅日本麵包，個個睇完都話東和馬嘅傳人終於出現喇！

首先出場嘅係，日本麵包16號！考吓你記唔記得叫咩名？一睇就知係富士山麵包啦！唔使發酵，將佢黐上去焗爐頂，控制好個火喉就得喇～不過屋企土地問題咁嚴重，邊有咁大個焗爐呀？傻豬嚟嘅～大有大整，細有細整，學人整個mini版咪得囉～！

人哋仲好貼心咁出埋個食譜?，真係Kind of sweet呀～ 不過溫度同時間會因應焗爐有所不同，記得「睇L住呀！」，唔係富士山大爆發變咗火山灰就唔好喇～

嫌簡單？好！睇埋呢個睇吓你仲有無咁牙擦。出嚟啦！日本麵包8號－綠龜麥芽麵包 ！呢個包最難就係焗完都仲keep住綠色，所以要用超低溫長時間焗成。

首先要捏返個龜形先，不過，樓主你呢句⋯⋯咁大家都要留意下個⋯⋯龜包嘅頭喇。你知啦，有啲嘢笨唔係話大就大嘅。

焗完出嚟靚到呢～雖然只係上咗少少色，但係同卡通有九成似，仲似過官方出嗰個呀！真係想一啖咬落佢個頭度呀，你係咪睇到都有啲手痕呢？毛毛都好想試吓整呀，作為一個專業嘅地獄廚神，毛毛呢個moment要⋯⋯返去由頭開始睇一次動畫先！