每一次聽到漫畫要拍真人版，都好擔心會唔會一秒崩壞。

之前毛毛聽到《銀魂》會改編成真人版電影，嚇到個心離一離，係聽到由小栗旬做「阿銀」先安心啲。

今日，電影嘅官方Twitter終於公開咗第一輪嘅定裝劇照喇！

由橋本環奈飾演嘅「神樂」，著住紅色嘅旗袍都入型入格。

而「新八」就會由菅田將暉飾演，眼鏡喺呢部分都發揮得淋漓盡致。日本網民仲話呢個造型還原度高，好「Kawaii ne」！

為咗做好「阿銀」呢個角色，小栗旬呢兩個月嚟仲操fit埋個body，唔知戲內會唔會有爆衫嘅場面呢？

毛毛希望呢一幕都有真人版就好！