呢個季節，涼涼地又有陽光，最啱就係去郊遊㗎喇～不過無論係山上定沙灘嘅垃圾都愈嚟愈多，香港都就嚟變臭港喇。

11月尾嘅時候，有位叫鈴木博將嘅日本環保組織Open Earth成員就組團，一行32人嚟到香港清潔沙灘喇。清潔香港之旅為期5日，每人要自費150,000円參加。佢哋去咗大嶼山大浪灣同埋南丫島蘆鬚城大掃除，短短兩日已經掃到135袋垃圾，總共有成552公斤咁多！

雖然執垃圾聽落又悶又攰，但佢哋笨唔係咁諗㗎，一邊扮鬼扮馬一邊清潔，成個活動又有意義又夠晒開心！連得10歲嘅小朋友都一齊嚟為保護環境出一分力呀！

其實今次唔係鈴木博將第一次嚟香港清潔沙灘嘅，佢今年8月嘅時候，上網見到香港沙灘滿滿都係殘體垃圾，所以就算唔識廣東話都一個人嚟香港屯門黃金海岸沙灘執垃圾，非常有心。咁多位愛護環境嘅日本朋友，多謝你哋呀！不過又咁講，鈴木博將得一個，班咁熱心嘅日本朋友都唔嚟得香港幾多次，所以最重要都係我哋大家記住自己垃圾自己帶走，打救自己！

封面圖片、資料來源連結：Hiromasa Suzuki

延伸閱讀：【最強身教】媽咪帶埋三歲囝囝一路行山一路執垃圾