搭飛機最驚就係「班次不似預期」，班機delay咗又唔知要等幾耐，check-in又可能多人到打晒蛇餅咁喎，咁樣樣等法真係等到想瘋狂爆粗呀！但係如果有隻小豬嘜過嚟陪你邊玩邊等，咁係咪開心好多呢？

話說呢隻豬豬叫Lilou，佢會著住條公主裙仔周圍行，氹返啲嬲豬旅客，等啲旅客喺機場等嗰陣冇咁悶～嗱，唔好睇佢豬仔細細呀，其實Lilou係經過專業訓練同挑選先做到呢份工㗎～咪就係睇中佢既淡定又好脾氣囉！

除咗Lilou之外，其實三藩市國際機場係有成隊「職業動物隊」做安撫旅客嘅工作嘅，之不過Lilou係第一隻加入嘅隊員，所以咪特別隆重其事囉。 佢哋每一隻都會戴住個寫住「摸我啦」嘅章，講明畀旅客任摸唔嬲，個個摸過都讚呢個服務夠晒治癒㗎～

講到專業嘅安撫員，又點會少得狗狗們呢？正所謂，你有壓力，我有壓力，就連聖誕老人都要同佢哋玩下Relax下～

老老77，係咪好葡萄人哋個機場有咁多小動物陪旅客玩呢？唔使咁失望喎，香港機場都有好多「小昆蟲」陪你玩嘢㗎，不過就越玩越大壓力咋嘛……

封面圖片及資料來源：Telegraph、flysfo／instagram