一年發現咁多關公災難，搞到關公仲忙過小鳳姐。正所謂自己關公自己做，而家就等毛毛同大家一齊跟呢位來自日本福岡嘅髮型屋老闆學下點低成本高效益宣傳啦！

老闆呀老闆，雖然擺鹽錐喺門口可以驅邪啫，但你呢碌會唔會大碌咗啲呀？唔同你早幾年學人盲搶鹽，所以先有咁多存貨？以毛毛9估，呢碌笨唔係驅邪神器咁簡單，而係聖誕裝飾嚟！咩啫…未見過畀白雪遮住晒嘅聖誕樹呀？白色聖誕吖嘛……

不過呢間髮型屋最犀利嘅都唔係鹽錐，而係啲poster呀！大家睇下 ，原來呢間髮型屋已經創業100年，係老字號嚟㗎喇……嗯，如果你睇唔到佢下一句寫住「仲有96年先到」咪係囉。

以為已經好高招？未算，髮型屋梗係要有好評先多客仔幫襯㗎嘛。大大隻字寫住「大受好評」，實吸引到客嚟整頭啦！不過佢講緊大受好評嘅竟然係⋯⋯駁腳毛服務？嗯，真係唔該晒。

雖然有人覺得老闆貼呢啲poster出嚟好無聊，都唔知做緊乜咁，但至少你得啖笑吖～老老77，其實老闆搞咁多笑都係想你幫襯剪個頭啫，而家人哋減價減到20円剪前蔭，你哋班人唔係咁都唔畀面呀？

封面圖片及資料來源：polinkey.welch／Facebook