【使唔使咁應節】拎隻生勾勾嘅公雞做新年交換禮物係咩玩法?

聖誕節交換禮物已經以為夠伏?如果你喺聖誕嗰陣換到啲杯呀、毛巾呀之類嘅嘢,都唔使咁灰嘅,起碼可以自己用,或者留返下年再拎返出嚟再抽過,將幸運pass畀下一位朋友呀嘛~呢位朋友仔仲sad呀,以為過咗聖誕先交換禮物,最多都係抽到啲揮春同利是封啫,點知抽到啲仲伏嘅應節禮物呀!

圖片來源:dcard

話晒嚟緊係雞年,所以周街都開始賣啲有雞仔圖案嘅嘢,真係忍唔住想唱返句「雞全部都係雞~」呀。不過估唔到,有人竟然應節到用一隻生勾勾嘅公雞嚟交換禮物呀!大佬,你買隻母雞我都叫做日日有蛋食呀,你買隻公雞畀我唔通真係當鬧鐘用咩!

圖片來源:dcard

呢個台灣嘅朋友仔除咗幫隻公雞影相擺上網呃下like,都唔知可以拎隻雞去做咩,煮咗佢又唔忍心,養佢又會朝朝六點就叫你起身。唉,唔好話你呀,你睇下雞大哥個樣幾不爽,完全就係問緊「你幾時畀個名份我」嘅樣呀! 好彩最後有個好心嘅老師肯收養隻公雞,唔係真係搵隻雞陪你過雞年喇~

圖片來源:oklook/ptt

其實呢份禮物都幾好呀,養著一隻好似呢隻咁有靈性嘅提款雞,分分鐘可以過個肥雞年𠻹呀~Any肥,溫提大家一句,咁樣交換禮物,係好笑嘅,不過就真係得啖笑囉~養寵物喺一生一世嘅承諾,千祈唔好亂送動物畀Fd子呀!

 

封面圖片及資料來源:dcard

毛記電視網站 · 版權所有 · 不得轉載 Copyright © TVMOST.COM.HK All rights reserved