細個跟阿媽去攝太歲，最難明就係有咁多個神像，點識分邊個打邊個呀，如果冇寫名咪好易認錯？原來唔止中國人嘅神易認錯，外國人都有呢個煩惱呀！天主教有咁多位聖人，好似聖伯多祿、聖安東尼、聖若瑟⋯⋯咁多個人，一時認錯咗，係咁㗎啦～好出奇呀？但好似呢個婆婆咁認錯法，都真係幾奇㗎～

話說婆婆係一個好敬虔嘅天主教徒，所以就會帶住一個細細個嘅聖安東尼像喺身，日日對住佢祈禱喇～不過婆婆嘅屋企人硬係覺得呢個像怪怪地，好熟口面⋯⋯真係見到都忍唔住要唱返句「在哪裡～在哪裡見過你～你的笑容這樣熟悉～我一時想不起～」，成日覺得同佢哋平時識嗰個聖安東尼有啲唔同樣㗎呢⋯⋯

多得Google有搜尋圖片呢個功能，簡直係造福萬民呀～終於畀婆婆屋企人發現到呢個「偽・聖安東尼」原來係《魔戒》嘅精靈王愛隆呀！不過要說服婆婆都唔容易㗎，話晒婆婆對住佢祈禱咁多年，有感情㗎嘛！最後婆婆都換返個啱嘅像嚟祈禱，但係佢一啲都唔擔心之前啲祈禱冇用喎，咁又係，愛隆咁nice，應該唔介意幫婆婆傳話嘅。

不過，婆婆點解會覺得聖安東尼同愛隆係同一個人呢？愛隆啲頭髮濃密好多下㗎啵！傻豬嚟嘅，你估婆婆好似你哋咁膚淺係睇外表㗎咩？以毛毛9估，婆婆一定係用佢個心感受到愛隆同聖安東尼都有一個善良嘅心，先認錯咗咋嘛～你哋班人夠成日認錯許生同杜生啦～明明許生啲皮膚就黑咁多！

封面圖片及資料來源： Boredpanda