【高手在民間】以為食緊雞 點知原來食緊暴龍!

每次食雞嘅時候,𦧲到成枱都係骨,都覺得自己好嘥呀,如果連骨都可以食埋,隻雞咪抵食一倍囉!之前見過有日本妹豬食完白頭佬炸雞,拎啲骨嚟煲湯畀男朋友飲,都已經覺得佢係天才廚神㗎啦,點知台灣都一樣有善用雞骨嘅高手呀!

圖片來源:吳俊逸

話說有個超強嘅網民食完雞之後,竟然用堆正常人轉頭就扔晒去嘅雞骨,砌咗隻暴龍出嚟!以前聽老師講鳥類係暴龍嘅近親,都心諗有乜x嘢可能呀阿Sir你咪作大啦,但睇過呢張相之後,就有衝動返小學同阿Sir講聲對唔住喇……

圖片來源:吳俊逸

唔係喎,諗諗下,佢砌到咁原整,會唔會根本唔係食緊雞,而係直頭食緊暴龍呀?!隻暴龍仔仲好似老鼠咁細隻就畀你食咗,真係冇陰公呀,知唔知咩叫保育呀?要食都應該食成長咗嘅暴龍,確保佢哋有機會繁衍下一代呀嘛,唔係佢哋好易絕種㗎!

圖片來源:吳俊逸

睇真啲,個高手仲要幫暴龍戴埋大眼仔係咩玩法……雖然墊枱嘅報紙就寫住「猛獸」,但上面嘅暴龍就流露絲絲少女情懷,真係咩霸氣都失晒呀。唔知暴龍哥見到,會唔會想講句「我叫咗你班hi仔幾hi多次,有客人喺度就唔hi好丟我架呀嘛」呢?

 

 

 

封面圖片、資料來源連結:吳俊逸

延伸閱讀:【點做到】日本強人用炸雞骨神還原王者基多拉

 

毛記電視網站 · 版權所有 · 不得轉載 Copyright © TVMOST.COM.HK All rights reserved