【主子私家位】呢張梳化個設計咁特別原來出自名貓手筆

人類成日都以為自己係萬物之靈,但係一遇到主子,都要甘心情願做奴才呀!話明係主子,梗係成間屋嘅嘢都係屬於佢㗎啦,包括你在內。不過為咗等你哋啲愚蠢嘅人類知道邊度係主子神聖不可侵犯嘅專屬地帶,就唯有辛苦啲留返啲印記嚟提示你哋啦~

圖片來源:FURYU5656/twitter

咦?呢張梳化嘅Design好特別喎,一般嘅梳化係漲卜卜咁㗎嘛,呢張個梳化頂兩邊都凹咗咁打耳嘅~仲要個弧度完全符合貓咪工學𠻹!邊度有得買呀?

圖片來源:FURYU5656/twitter

原來係由兩隻名貓設計師精心設計嘅非賣品~兩位聖上特登每日都瞓喺嗰個位,先造到呢個完美嘅凹位,真係完全貼合主子嘅身形嚟度身訂造㗎!咁又係,你哋啲貓奴咁蠢豬,靠你哋揀啲啱主子瞓嘅傢俬,不如由主子自己將傢俬大改造,實行自己的床自己整!

圖片來源:oken_ne/twitter

圖片來源:oken_ne/twitter

好似呢位主子咁就醒目喇,啲奴才成日都以為張凳仔係坐有公仔嗰面,真係傻西瓜嚟嘅,反轉佢嚟坐先啱㗎嘛,個窿啱啱好可以塞晒成個patpat落去,仲有埋扶手位晾住對手手𠻹!

圖片來源:oken_ne/twitter

你睇下主子坐得幾舒服,直頭舒服到瞓著覺呀~你哋啲奴才唔會明白貓星人嘅智慧㗎喇,都係乖乖哋做個剷屎官,睇下聖上幾時又「賞賜」件御爪設計嘅新傢俬畀你罷啦。

封面圖片及資料來源:FURYU5656/twitteroken_ne/twitter

毛記電視網站 · 版權所有 · 不得轉載 Copyright © TVMOST.COM.HK All rights reserved