細個興儲貼紙，大個就興儲MT，即係紙膠紙呀～冇變嘅就係都一樣會畀阿媽鬧，話買埋咁多做咩喎。買嚟就梗係有用啦～買返本某某日本牌子嘅Schedule Book ，跟住起勢咁黐，整到懶係靚咁，都不知幾有成功感呀！不過原來黐Schedule Book同整手作仔已經濕濕碎喇，真正嘅高手高手高高手係用MT嚟砌名畫呀！

一卷卷嘅MT，喺呢位網民嘅手上，只要起勢搣再起勢咁黐，竟然可做到油畫嘅效果呀！仲要唔係普通嘅畫，係世界級嘅莫奈名畫喎！唔講真係睇唔出呢《蒙托爾熱街》係用MT黐出嚟㗎。嘩～又要摵又要逐條黐，咪要好耐時間先完成一幅畫？

仲有莫奈另一幅名畫睡蓮系列嘅《綠色的和諧》，真係有圖有真相，真係用MT砌㗎，仲要用好多卷唔同嘅MT，先砌得出咁複雜嘅顏色層次，少啲耐性同眼力都唔得掂呀。

不過呢位MT神手唔止淨係識畫名畫，就連小清新花圈同埋超打耳嘅貓仔狗仔都難唔到佢，真係整得好似同好靚啵～最犀利嘅地方係，呢位網民唔係去上堂學，而係無師自通㗎！喺佢嘅Blog度仲會教大家點樣貼到呢啲靚畫，但係想學都唔易㗎，呢位網民摵到手指又痛又起晒枕先有今時今日嘅功力咋，如果你仲想keep住對白滑嘅雙手，就都係欣賞下算啦～

封面圖片及資料來源：dcard、tttsusan／痞客邦