雖然喵星人有紙皮箱就萬事足，但係做奴才嘅，都一樣要定時進貢唔同新禮物畀主子，等佢可以同其他喵星人show off下嘅。最近外國有個貓奴就上網買咗個貓抓塔畀主子，希望佢爪下留情，放過屋企其他傢俬喇。

喂，呢個係就係三層貓抓塔，不過會唔會迷你咗啲呀？奴才你係咪玩嘢呀？

「玩囉玩囉，咁都夠膽拎嚟進貢，朕就玩畀你睇！用對眼玩呀！蠢才！」

聖上嘅眼神已經發出強烈嘅怨念signal，不過都請主子息怒呀，可能奴才都係見平時買咩畀你你都淨係玩個包裝紙皮箱，先特登買呢個迷你貓抓塔，等你重新發現原來自己都渴望有得玩貓抓塔呢～你知啦，人總係要冇咗先識得珍惜㗎嘛。

話時話，個貓抓塔縮到咁細，個網拍賣家都好過份啫，一於告9佢啦！

咪住先，睇返阿媽鬆個網，人哋又真係有寫明係「迷你模型」，仲講埋係45mm高㗎囉……以咁嘅智慧，又好難怪你畀主子食住嘅……

唔好以為冇買錯玩具貓抓塔就咩事都冇呀，有另一個貓奴明明係買正常貓抓塔但都中過伏㗎！話說佢個貓抓塔送到嚟都係比圖片細少少，搞到主子唯有屈就自己，夾硬塞個屁股入去囉～

話唔定其實主子都覺得個貓抓塔伏伏地，心諗玩裝住個塔嗰個紙皮箱好過㗎喇，不過佢驚奴才唔開心，所以先勉為其難玩下咋。真係估唔到主子傲嬌嘅表面底下，都有一顆關心奴才嘅心，唔怪得咁多人類做一世貓奴都願啦！

Note to self...check the dimensions of EVERYTHING before ordering on Amazon... from funny

封面圖片、資料來源連結： cewallace9／reddit、Amazon、QueenofChances