近排天氣咁反常，時凍時熱，真係稍為唔小心都會病呀。當香港搞到好似冇冬天咁嘅時候，喺土耳其嗰邊就落大雪，氣溫仲試過急降到得返-15度呀！人就話可以去避寒中心取暖啫，但係流浪狗狗點算呀？又冇屋企返，出面又咁凍咁難搵食，咁佢哋條命仔咪凍過水呀？

好彩呢個世界仲有好多有愛心嘅人～喺伊斯坦堡有班好心人就自發喺一個購物中心鋪晒毛氊、擺晒狗糧，等啲流浪狗狗可以入去避寒休息。所有物資都係呢班好人自己喺屋企拎或者出錢買㗎！

睇下狗狗瞓得幾冧～多得呢一班哥哥姐姐，唔介意冒住寒冷天氣，不斷喺屋企拎啲物資嚟，狗狗先可以有個安樂窩過冬咋，其實購物中心肯放流浪毛孩入嚟休息，都已經抵畀個like佢啦！

有賣衫嘅鋪頭仲直接放埋狗狗入去，等佢哋可以喺室內有暖氣嘅地方取暖?！狗狗直程舒服到反轉個肚肚攤喺度瞓呀～

雖然喺土耳其伊斯坦堡呢個冬天好凍，但相信呢班毛孩嘅心入面一定好warm啫～呢種尊重生命嘅心態真係好值得所有人學習呀！

封面圖片及資料來源：每日郵報、Arzu Inan／Facebook