【好厚面皮】種到個青檸咁大 切開你畀啲咁嘅嘢我睇?

大家有冇試過種嘢呀?毛毛唔係講緊種票,毛毛真係講緊種植物喎。睇住自己親手種嘅植物一日一日咁長大,仲要爆埋果實出嚟嗰下,真係好有成功感㗎~之不過學Do姐話齋,意外即係意料之外,你以為你種到個果實出嚟就代表你有得食㗎喇咩?

圖片來源:連環泡有芒果/Facebook

話說有位台灣媽媽就含辛茹苦咁湊大咗粒青檸,大家睇下粒青檸望落幾靚仔,青靚白淨都叫做中咗一半,而且仲要生到咁大隻𠻹,睇嚟呢位媽媽一定落咗唔少心機同時間去栽培佢頂嘞。好!而家就等我劈開佢,將呢個巨型青檸入面滿嘅果肉拎出嚟啦!

圖片來源:連環泡有芒果/Facebook

咦,說好的果肉呢喂?拳頭咁大個青檸,切開你畀啲咁嘅嘢我睇?唉,呢位媽媽最初仲要懶威威咁叫齊全屋人見證傳奇一刻𠻹㗎,你叫呢位媽媽以後點面對屋企人啫?Molamola……個青檸厚面皮成咁,真係連媽媽嘅面子都冇喇……

讀者來圖:Horings Ng

btw,呢位媽媽又唔使太傷心嘅,雖然阿檸個面皮係厚咗啲,內涵又少咗啲啲,但至少個內裡都係結結實實吖。唔似得而家啲空氣包咁,正一空心老倌,望落漲卜卜,咬開得陣風咋~


封面圖片及資料來源:連環泡有芒果/Facebook

毛記電視網站 · 版權所有 · 不得轉載 Copyright © TVMOST.COM.HK All rights reserved