網上好多唔同嘅流言話Macbook其實有一啲隱藏設定，只要用特定方法就可以搵到呢啲「寶藏」出嚟㗎喇，例如有人就話用Macbook下載Pages之後可以喺某個檔案搵到Steve Jobs嘅演講稿。最近又有人話連硬件都有開心大發現呀！

有人拆開部Macbook檢查嘅時候，竟然見到入面有個銀仔，仲要係喺個SuperDrive嘅塑膠封膜入面呀！搞到佢都唔知拎唔拎出嚟好，如果放入去係有特別用途嘅咪大檸樂？呢啲時候梗係要上網問下大神點睇啦！

點知一係唔Po，一Po就發現You are not a窿喇。原來其他人都有呢個疑問，但係個個都以為係Design咪冇理佢囉，除咗有美金，有人仲發現有加幣?！唔通呢個特殊設計仲會分埋地域，唔同地方用返唔同嘅貨幣？

真相只得一個！就喺呢個時候就有一個話自己做過Genius Bar嘅朋友話，其實純屬巧合啫～可能有人唔小心喺入DVD位度跌咗啲嘢入去囉～佢幫啲客拆過咁多機，話銀仔已經唔出奇喇，連SDcard、啤牌，甚至新衫標籤攝咗入去都有呀！究竟呢啲人係點樣做得到嘅呢⋯⋯

雖然只係一場美麗嘅誤會，但係可以由DVD入口度經過咁多零件，仲要喺唔整壞部機嘅情況下，再跌到去Superdrive嘅後面，呢個銀仔嘅毅力都相當驚人喇！以毛毛9估，其實呢個係Macbook 隱藏嘅儲蓄功能就真！如果大家月尾冇錢，都不妨打開部機睇下，話唔定會有意外收穫呢？以上資訊由窮L提供，心智未成熟人士使用此方法請先向專業人士咨詢。

封面資料及資料來源：每日郵報