【可憐的柴柴】驚你冷親先畀衫你著啫 個樣使唔使咁慘呀

未見過,真係未見過……毛毛講緊明明已經一月都成廿幾度嘅反常天氣呀!著咗咁多日短袖tee,今日終於涼返少少,可以拎件鋪晒塵嘅冷衫出嚟著一著喇~轉凍嘅時候唔止我哋要著多件衫呀,連狗仔都要㗎~狗仔成身毛仲要著埋冷衫仔,一定唔止好得意,仲好好攬啫!

圖片來源:takase_farm/twitter

柴柴,你個樣做咩咁慘情呀?男人老狗,大家明嘅,唔係為咗錢就係為咗女人囉,人少少講嚟聽下啦,毛毛唔會周圍唱畀人知嘅~

圖片來源:takase_farm/twitter

原來呢隻個樣咁可憐嘅柴柴,唔係失戀又唔係冇罐罐食,更加唔係畀主人鬧完嚟,而係因為唔鍾意著衫仔出街街呀!主人見天氣開始轉凍,咪幫佢著件冷衫毛帶佢散步囉,點知佢就即刻擺個慘樣出嚟,唔講成街嘅人仲以為佢冇飯食先咁樣𠻹呀!

圖片來源:takase_farm/twitter

「主人,件衫隻色咁娘就好心咪畀我著啦……我真係連落一落街都唔想呀大佬……」

圖片來源:takase_farm/twitter

人要面樹要皮,狗狗都一樣要靚靚嘅,呢隻柴柴唔止貪靚,啲表情仲好鬼誇張,好似識做戲咁,係咪想拎奧斯卡最佳男狗角先!之前主人買咗個花圈戴落佢條頸度,佢即刻睜大對水汪汪眼瞇瞇笑,成個女高中生咁卡哇依呢!一定就知佢最鍾意呢個花花look look 啦!

圖片來源:takase_farm/twitter

嘩,呢隻狗狗……係咪畀人遺棄,等緊好心人畀一個家佢㗎?睇真啲先啦,其實呢隻,都係頭先嗰一隻貪靚柴柴嚟㗎!主人話佢有一日唔知去邊度玩完返屋企,竟然玩到變咗隻污糟豬,成身都係泥,大家都話佢由女高中生變咗個大叔咁樣樣呀!成日都咁百變,會唔會有時連主人都唔認得佢㗎?

 

封面圖片、資料來源連結:takase_farm/twitter

 

毛記電視網站 · 版權所有 · 不得轉載 Copyright © TVMOST.COM.HK All rights reserved