一直以嚟，人類都以為係自己養緊貓貓，唔知道其實係嚟自外星嘅貓貓收咗人類做奴隸，甚至計劃緊征服全個藍星！之前我哋都搵到喵星人打開人類電腦偷睇機密、匿喺任何窿窿監視人類一舉一動、同埋揸住支步槍隨時ready伏擊路人嘅證據，呢一切一切，都證明咗喵星人入侵嘅野心有幾大！

人類要自保，梗係要知己知彼啦！平時得喵星人知道人類嘅日常活動範圍，但相反，人類就對佢哋一無所知。好彩，終於有個日本攝影師發現咗通往貓星嘅神秘通道！

冇錯，就係呢度喇！坑渠只係佢表面嘅掩飾，事實上，佢係一個秘密通道嚟嘅，問你死未！估唔到喵星人進駐藍星之後，都學識「最安全嘅地方就係最危險嘅地方，最危險嘅地方就係最安全嘅地方」呢個咁有親切感嘅大道理，明白到街邊嘅坑渠雖然好顯眼，但就係佢哋返去秘密基地嘅最好掩飾！

喵星人仲利用自己純情嘅外表，特登喺瓹入坑渠窿窿嘅時候扮晒論論盡盡，等人類一見到就掛住影相同尖叫「巧打耳呀」，察覺唔到原來呢個係通往貓星嘅神秘通道，真係好高招呀！

攝影師，小心呀！你趁喵星人瓹窿窿嗰陣偷偷地第三類接觸，驚唔驚佢哋捉你返喵星慢慢審呀？！

封面圖片、資料來源連結：nyankichi5656／instagram
《喵星人入侵地球證據大集合》

【狙擊手準備】報告！發現喵星人打算消滅人類嘅證據呀！

【仲捉你唔到】就係你撞錯我電腦密碼三次！

【你大我呀】奴才 你個監視器已經畀我收服咗喇！

【發現新型監視器】只要有窿窿 就有喵星人出現