「拍拖唔放閃，咁我拍嚟做咩喎？嗱，唔使理班單身狗㗎，總之無論我哋食過咩做過咩影過咩相，都一定要畀全世界知道，一於有幾閃得幾閃！唔係咁樣，又點證明到我哋愛得有幾深啫！」

話說，最近有對韓國情侶就諗住影返張sweet sweet閃照嚟呃like啦，仲連十大呃like道具之一－蛋糕都準備埋?！大家睇下呢對情侶，男嘅就扮同個蛋糕錫錫，而女嘅就扮到想一嘢咬落個蛋糕度咁～老老77，交戲交到咁足，想唔畀你哋兩個閃死都好難啦！

跟住唔知係咪個韓妹諗諗下都係覺得兩個人擺埋同一個甫士會sweet啲呢，佢突然改咗甫士，同呢位韓仔一樣扮同蛋糕錫錫喎。喂，你個韓妹會唔會陣間又話都係要兩個人錫埋先夠sweet㗎？毛毛冇興趣睇人哋無限kissy kissy kissy再來兩輪kiss喎……唉，毛毛呢啲單身狗都迴一迴避先。

估唔到毛毛迴一迴避，呢位韓妹就出事喇！哎呀，都話咗兩個人拍拖唔好咁黐身要畀返啲空間大家㗎啦，個韓妹就咁畀支蠟燭燒著咗佢執空氣瀏海喇……唔通連支蠟燭都葡萄佢哋影放閃照？

計毛毛話，一定係空氣瀏海嘅錯！細細個讀書嗰陣老師都有教過「火三角」嘅規律啦，一定要有齊熱量、燃料同氧化劑先會燃燒㗎嘛，你執瀏海話明空氣瀏海就梗係多氧氣喺裏面，梗係易著火啦！一定係，除非唔係。

資料來源：인스티즈