香港冬天凍極有限，除咗睇啲人造膠雪飄飄下，都冇咩機會睇到雪㗎喇，想睇雪嘅朋友唯有儲錢飛去其他地方睇啦～識睇雪一定係去日本睇，因為除咗睇落雪嘅靚景，喺大街小巷都有千奇百趣嘅畫面出現㗎！

日本落咁大雪，天寒地凍，搵部售賣機買返罐熱咖啡飲下都好喎～咦，點解好似有咁多對眼望住我咁嘅呢？原來係呢三個回收箱！人哋都知你哋好凍，但係你咁眼甘甘望住人，叫人點好意思飲啫？

望望下好熟口面喎⋯⋯你哋咪就係菇菇？！

有人見佢哋眼大大咁打耳，咪加返個咀仔畀佢哋囉～Em⋯⋯有啲嘢都係冇口會比較可愛啲嘅，應該係。

除咗樣之外，其實燈光都好重要㗎，好似呢個回收箱咁，喺售賣機隔籬嘅陰暗角落，但另一邊又有微弱嘅燈光打落佢塊面度，佢仲要望住你笑，真係笑到你心都寒埋呀⋯⋯

喺日本，落雪可以令啲好平凡嘅嘢變得唔平凡，除咗呢啲回收箱，就連單車都有magical moment呀！唉，落雪落到啲積雪咁厚，想學《飆速宅男》咁飛車返學都唔得，唯有做推車宅男，慢慢推返去罷喇。

但呢個怒漢推下推下，架單車前轆竟然變咗一塊結結實實嘅「雪餅」呀，So Amazing！所以話，其實落雪又有咩好怕喎，仲有大把嘢可以玩同影相呃like㗎嘛，你估係霧霾a.k.a.毒氣咩。

 

封面圖片及資料來源：z9z9a9v／twitter、jonasanWRX／twitter

自販機のゴミ箱可愛い pic.twitter.com/is0AOdmn7S

— いちかわ (@z9z9a9v) January 15, 2017