每到年尾買新月曆嗰陣就會發現，原來上一年搣到咁上下就唔記得咗佢嘅存在⋯⋯咁又係嘅，而家用電話check日子咁方便，都好少特登行過去睇個月曆啦，所以唔記得搣都好正常啫～

呢隻雀仔就夠晒生性喇，知你啲人類成日唔記得搣，咪幫你搣埋囉～咪住先，雀大哥，而家1月都未過，你咁快就搣到去3月？唉，所以話你都唔明白雀仔嘅苦心，佢見你毒L一名，咪快快手搣咗2月佢，費事你見到2月14觸景生情咋！

其實好多雀仔都係一個好幫手嚟㗎～好似呢隻肥嘟嘟嘅文雀，見到主人好似冇買鏡餅（即係過年用嘅年糕），做寵物嘅就唯有當報恩，幫佢扮住鏡餅先啦～不過呢嚿年糕咁軟綿綿，似乎煮到過咗籠啵～

仲有呢隻畀主人話似和菓子嘅鸚鵡仔～其實佢係見主人你搵唔到個網球，所以走出嚟扮住網球先咋，乜得你掛住食㗎～但係鸚鵡仔你咁卡哇依，主人又點捨得拎你當網球打喎。主人呀主人，有啲咁生性嘅雀雀幫你手，今年應該提早12個月出花紅，加返啲雀粟喇啩！
 

封面圖片及資料來源：darumann230／twitter、hana_murya​／twitter、mura_kfk0228