2017年01月16日 星期一
【識玩一定係咁玩】森林家族睇落得得意意原來咁勇敢
邊個話得小朋友先可以玩玩具㗎，不知幾多大人鍾意收工返屋企瘋狂玩玩具減壓呀！你又諗咗去邊呀衰鬼，唔係講緊實用性玩具呀，而係細個好想要但又冇錢買，唯有大個之後自己努力賺錢買返，補償自己童年呀。
雖然係玩返同一件玩具，不過話晒都大個仔喇，梗係有自己一套玩法啦。森林家族嘅小動物咁打耳，幫佢哋著下衫仔開下Party咪好囉，做咩搵啲硬膠猛獸圍住佢哋呀？！唔通個玩具主人係變態嘅，最鍾意睇森林家族驚到腳軟個樣？
世界將我包圍～誓死都一齊！估唔到森林家族睇落得得意意，原來咁勇敢㗎！佢哋頭先扮晒驚驚咁，其實只係想之令班硬膠猛獸減低警覺性，再一嘢拎支槍出嚟嚇走佢哋！連阿B都夠膽拎住把手槍企最前，真係好有型呀！
唔止呀，之前有一次，森林家族喺大宅開開下party，竟然有班蠱惑仔唔知頭唔知路入咗嚟蝦蝦霸霸！見佢哋拎住槍，班兔仔唯有棄pizza逃亡啦！
「想食pizza啫，出聲囉，使唔使咁惡呀，畀你喇！」
好彩，話都冇咁快，警察叔叔就嚟到拉咗班小流氓返去喇！洗定個八月十五坐花廳啦！森林又可以回復和平喇，多謝你呀警察叔叔！
雖然呢個大人嘅玩法係好有創意，帶畀大家完全唔同嘅森林體驗，不過，毛毛都係覺得B女先係最識玩嘅幕後玩家囉……
全シルバニアライフル協会
— おはなしのくに (@kasekihamaguri) January 15, 2017
「銃さえあれば助かる」
#大人のシルバニア pic.twitter.com/F18kQ2smD3
封面圖片、資料來源連結： kasekihamaguri／twitter、43ismamorigami／twitter
《森林家族感到無奈，但森林家族不說》
