成日都話狗狗係人類最忠心嘅朋友，但其實汪汪又點止當我哋係朋友咁簡單吖，直程當正係屋企人?啦！當主人有事嗰陣，狗狗就會第一時間出嚟保護佢；主人唔開心嘅時候，汪星人又會施展混身解數嚟氹返主人，真係好sweet㗎！

對於外國呢個主人，狗狗唔止係寵物，仲係救命恩狗呀！是咁的，呢位64歲嘅伯伯睇緊波嘅時候，見火爐個火就快熄，所以咪出屋外拎返碌廢柴入屋燒囉，點知咁就出事喇！著住睡袍拖鞋嘅伯伯，唔記得小心地滑，一行出去就仆⋯⋯咗喺雪地度呀！

睇到呢個印就知伯伯名副其實跌到攤攤腰啦！最慘係伯伯郁唔到，又著唔夠衫，冰天雪地，但伯伯啲鄰居住到400米之外，真係叫天不應叫地不聞呀，molamola⋯⋯ 呢個時候多得忠犬Kelsey發現到伯伯，衝出嚟係咁吠，點知都係冇人聽到呀陰公！

呢黃金二十小時，Kelsey唔止Keep住喺咁吠希望有人搵到，仲趴喺主人個身上面幫佢取暖，又喺咁舔佢要主人保持清醒。如果唔係咁，主人喺深夜咁凍嘅時間著咁少衫，一定捱唔到啲人嚟救佢啫！伯伯畀人救咗之後，仲好擔心自己郁唔到，以後咪照顧唔到Kelsey囉？好彩經過治療佢已經慢慢康復緊喇～

雖然狗狗有時係好百厭，但係佢哋真係好愛我哋㗎～對於汪星人嚟講，我哋就係佢哋世界嘅全部，所以大家都要好好錫住自己屋企嘅汪汪，話唔定有一日佢仲會救返你條命?！

封面圖片及資料來源：odditycentral、today