香港好多地方都係唔畀帶寵物入去嘅，不過有時都會喺商場見到狗狗，大家唔使咁驚訝喎，其實佢哋係導盲犬嚟㗎！導盲犬受過專業訓練，會陪住視障人士出街，係佢哋嘅醒目好幫手！

佢就係接受緊導盲犬訓練嘅台灣狗狗Betty喇。話說早幾日佢同訓練員陳小姐一齊搭巴士嘅時候，一上到車，個司機叔叔竟然即刻開咪廣播！唔通佢想趕Betty落車？唔係喎，明明導盲犬係可以上車㗎喎！

原來司機叔叔期待咗可以載到導盲犬好耐，終於畀佢等到呢個機會喇！佢興奮到開咪向咁多位乘客隆重介紹「啱啱上車嘅就係導盲犬喇！」跟住仲同大家介紹，導盲犬其實唔識睇紅綠燈，而係靠睇車流，加上主人嘅判斷去過馬路嘅～

訓練員話，佢同Betty上咗車40分鐘，司機叔叔全程車都喺度落力介紹導盲犬，仲解答晒乘客嘅疑問?呀！訓練員仲話，以前試過畀其他司機拒載甚至不禮貌對待，見到司機叔叔咁熱情，令到佢覺得好感動呀！

原來司機叔叔咁熟識導盲犬，都係因為睇過《導盲犬小Q》！導盲犬又醒目又乖仔，好似小Q咁可愛，真係見到都想摸下佢個頭呀～雖然係咁，大家都要記住，如果喺街上見到導盲犬，唔好撩佢哋玩或者阻住佢哋工作呀，唔係就可能會為視障人士帶嚟不便甚至係危險㗎喇～

封面圖片、資料來源連結：當Betty遇見Bagel

同場加映：《星期三港案》 最好的分離